5 yoshdan kichik bolalarga choy berish haqida ☕️ Bizning xa...

5 yoshdan kichik bolalarga choy berish haqida ☕️ Bizning xalqimizda choy oddiy ichimlik emas — u madaniyatning bir qismi. Mehmon kelsa ham, ovqatdan keyin ham, suhbat orasida ham albatta choy damlanadi. Bolalar ham tug‘ilganidan boshlab kattalarning shu odatini ko‘rib ulg‘ayadi va tabiiy ravishda choyga qiziqib qoladi. Lekin kichik yoshdagi bolalar organizmi kattalarnikidan ancha nozik va sezgir bo‘ladi. Ayniqsa 3-5 yoshdan kichik bolalarga qora yoki ko‘k choyni muntazam berish tavsiya etilmaydi. Sababi choy tarkibida kofein mavjud. Bir stakan qora choyda o‘rtacha 30–50 mg kofein bo‘lishi mumkin. Bu kattalarga oddiy tuyulsa ham, kichik bola uchun ko‘p hisoblanadi. Kofein bolalarda uyqu buzilishi, bezovtalik, yurak urishining tezlashishi va ishtaha pasayishiga sabab bo‘lishi mumkin. Bundan tashqari choy tarkibidagi ”tannin“ moddasi temirning so‘rilishiga halaqit beradi. Bu esa ayniqsa tez o‘sayotgan bolalarda kamqonlik xavfini oshiradi. Ko‘pchilik kattalarning “bir kun choy ichmasam boshim og‘riydi” deyishlari ham aslida organizmning kofeinga o‘rganib qolganidan bo‘ladi. Kofein vaqtincha tetiklik beradi, lekin organizm uni asta-sekin talab qila boshlaydi. Aslida bola chanqaganda organizm suvga ehtiyoj sezadi. Choy, sharbat yoki gazli ichimliklar suvning o‘rnini to‘liq bosa olmaydi. Suv moddalar almashinuvi, tana haroratini saqlash, mushaklar rivojlanishi va umumiy sog‘lom o‘sish uchun juda muhim. Yoshligidan suv ichishga o‘rgangan bolalarda shirin va zararli ichimliklarga qiziqish ham kamroq bo‘ladi. Eng yaxshi odatlar aynan bolalikdan shakllanadi. Farzandlarimizga eng oddiy, lekin eng foydali odatni — suv ichishni o‘rgataylik 🤍